Մահացել է Բրիտանիայի ամենաշատ ծեծի ենթարկված լրագրողը

Կարճատև հիվանդությունից հետո մահացել է լեգենդար բրիտանացի հեռուստահաղորդավար, հետաքննական լրագրության վետերան Ռոջեր Կուկը: Այս մասին, հղում անելով նրա ընտանիքին, հայտնում է Daily Star-ը։

«Բացի լրագրության ոլորտում ունեցած փայլուն և բազմաթիվ մրցանակների արժանացած կարիերայից, Ռոջերը նախևառաջ սիրելի ամուսին և հայր էր։ Մենք բոլորս նրան շատ ենք կարոտելու»,- նշել են հարազատները։

83-ամյա Կուկն ավելի քան 50 տարի աշխատել է հեռուստալրագրության ոլորտում և հեղինակություն ձեռք բերել որպես հանցագործությունների, կոռուպցիայի և անարդարության բացահայտող։ Նա բազմիցս դեմ առ դեմ բախվել է իրավախախտների հետ, իսկ հարցազրույցների ընթացքում հաճախ ենթարկվել է ծեծի։

Կուկին անվանել են «Բրիտանիայի ամենաշատ ծեծի ենթարկված լրագրողը»․ նա տասնյակ անգամներ հայտնվել է հիվանդանոցում, ստացել է մատների, ձեռքերի և կողոսկրերի կոտրվածքներ, իսկ 12 անգամ ծեծի է ենթարկվել մինչև գիտակցությունը կորցնելը։

ITV հեռուստաընկերության ներկայացուցիչները Կուկին անվանել են բրիտանական լրագրության ամենահեղինակավոր դեմքերից մեկը։

«Ռոջեր Կուկի նորարարական մոտեցումը հետաքննական լրագրությանը նրան դարձրեց հեռարձակման ոլորտի ամենավստահելի և հարգված գործիչներից մեկը։ Իր «Կուկի ռեպորտաժը» լրատվական ծրագրում նա անխոնջ աշխատում էր հանցագործությունների և անարդարությունների բացահայտման ուղղությամբ՝ նպաստելով օրենսդրական կարևոր և երկարաժամկետ փոփոխությունների իրականացմանը»,- նշել են հեռուստաալիքի ներկայացուցիչները։