Առաջիկայում «Հյուսիսային հոսք»-ի գազատարները, որոնք վնասվել են 2022 թվականի աշնանը, վերանորոգելու և շահագործման հանձնելու ծրագրեր չկան, գրում է Reuters-ը՝ վկայակոչելով աղբյուրների, այդ թվում՝ Ռուսաստանից։

«Մոսկվան չի ակնկալում, որ իր հարաբերություններն Արևմուտքի հետ այնքան կբարելավվեն, որ տեսանելի ապագայում գազատարները նորից անհրաժեշտություն դառնան»,- ասել են գործակալության երկու աղբյուրներ։

Ռուսական աղբյուրներից մեկը Reuters-ին ասել է, որ Մոսկվան նախագիծը համարում է «թաղված»։ Մյուս երկուսն էլ նշել են, որ խողովակաշարերը կպահվեն ապագա հնարավոր վերաբացման համար:
 

«Դա կարող է տեղի ունենալ, եթե ԱՄՆ-ի հեղուկ բնական գազը, որը ԵՄ երկրներն այժմ օգտագործում են Ռուսաստանի որոշ մատակարարումները փոխարինելու համար, չափազանց թանկ դառնան»,- հավելել է Reuters-ի աղբյուրներից մեկը:

2022 թվականի սեպտեմբերին Nord Stream օպերատոր ընկերությունը հայտարարեց «Հյուսիսային հոսք1» գազատարի երկու լարերի և Nord Stream 2-ի երկու լարերից մեկի ոչնչացման մասին։ Երկու գազատարներն էլ անցնում են Ռուսաստանից Գերմանիա Բալթիկ ծովի հատակով: Այն ժամանակ դրանք չէին աշխատում՝ դադարեցվել թր «Հյուսիսային հոսք 1»-ով գազի մղումը, իսկ «Հյուսիսային հոսք 2»-ը այդպես էլ չշահագործվեց։

Շվեդիայի, Դանիայի և Գերմանիայի իշխանությունները սկսել են գազատարների վթարների հետաքննությունը։ Շվեդիայի իրավապահ մարմինները, ուսումնասիրելով «Հյուսիսային հոսք»-ի արտահոսքի վայրերը, հաստատել են գազատարների պայթյունների վարկածը և հայտարարել պայթուցիկի հետքերի մասին։ Խողովակների վրա անցքեր են հայտնաբերվել, որոնցից մեկի տրամագիծը ութ մետր է եղել։ «Գազպրոմը» հայտնել է, որ սկսել է լուծում փնտրել գազատարների վերանորոգման համար։

Արևմուտքում Ռուսաստանին կասկածում էին «Հյուսիսային հոսքը» տապալելու մեջ։ Իր հերթին, ՌԴ նախագահ Վլադիմիր Պուտինը պայթյունների համար մեղադրել է անգլոսաքսոններին։ Փետրվարին հայտնի ամերիկացի հետաքննող լրագրող Սեյմուր Հերշը հոդված է հրապարակել, որտեղ մեղադրել է ԱՄՆ իշխանություններին և հետախուզական ծառայություններին «Հյուսիսային հոսք»-ը տապալելու մեջ։ Կրեմլն այն անվանել է «շատ կարևոր նյութ»։