Պենտագոնը չի համարում, որ ՉԺՀ-ի կողմից «Թայվան ներխուժումը» կարող է տեղի ունենալ մոտ ապագայում և լինել անխուսափելի։ Այս մասին ասել է   ԱՄՆ պաշտպանության նախարարի  Հնդկախաղաղօվկիանոսյան տարածաշրջանի հարցով օգնական Էլի Ռաթները:
 

«Պաշտպանության նախարարությունը չի հավատում, որ Թայվան ներխուժումը տեղի կունենա շուտով», - ասել է նա՝ ի պատասխան ԱՄՆ Սենատի արտաքին հարաբերությունների հանձնաժողովի լսումների ժամանակ առնչվող հարցի:
 

«Ես լիովին հավատում եմ, որ մենք կարող ենք հասնել այս տասնամյակի ավարտին՝ առանց Թայվանի դեմ մեծ ագրեսիայի», - հավելել է Ռաթները։
 

Թայվանը՝ չինական ամենամեծ կղզին, 1949 թվականից կառավարվում է սեփական վարչակազմի կողմից։ Պաշտոնական Պեկինը կղզին համարում է չինական նահանգներից մեկը։
 

Թայվանի շուրջ լարվածությունը սրվեց 2022 թվականի օգոստոսին Ներկայացուցիչների պալատի այն ժամանակվա խոսնակ Նենսի Փելոսիի` Թայբեյ կատարած այցից հետո: Դրա ավարտից հաջորդ օրը Չինաստանի Ժողովրդա-ազատագրական բանակը լայնածավալ հրթիռային զորավարժություններ է իրականացրել կղզու ջրային վեց գոտիներում։