Հռոմում ջերմաստիճանը կհասնի +38°C-ի. իշխանությունները «կարմիր» նախազգուշացում են հայտարարել

Իտալիայի առողջապահության նախարարությունը չորեքշաբթի օրը սպասվող շոգի նոր ալիքի պատճառով յոթ քաղաքներում, այդ թվում՝ Հռոմում, սահմանել է եղանակային վտանգավորության ամենաբարձր՝ «կարմիր» մակարդակ:

Այս մասին ծանուցումը հրապարակվել է գերատեսչության պաշտոնական կայքում։ Ընդ որում, Պերուջայում և Ֆլորենցիայում «կարմիր» նախազգուշացումն ուժի մեջ է մտել դեռևս երկուշաբթի օրվանից։ Ըստ օդերևութաբանների՝ տապի այս ալիքի պատճառը դեպի արևելք տեղաշարժված աֆրիկյան անտիցիկլոնն է, որն այս անգամ ամբողջությամբ պատել է Ապենինյան թերակղզին։ Կանխատեսումների համաձայն՝ Իտալիայի կենտրոնական ու հարավային հատվածներում, ինչպես նաև Սարդինիա կղզում օդի ջերմաստիճանը հասնելու է 39-41 աստիճանի։ 

Մասնավորապես, Ֆլորենցիայում սպասվում է մինչև 39 աստիճան, իսկ մայրաքաղաք Հռոմում՝ մինչև 38 աստիճան տաքություն։ Ուժգին շոգի պատճառով օդերևութաբանները հորդորում են ձեռնարկել նախազգուշական բոլոր միջոցները, ինչն առանձնահատուկ կարևոր է տարեցների ու երեխաների համար։ Նրանց խորհուրդ է տրվում հնարավորության սահմաններում չլքել տները, խմել մեծ քանակությամբ ջուր և խուսափել ֆիզիկական ծանրաբեռնվածությունից։