30 միլիոն դոլար արժողությամբ տիրանոզավրի կմախքը կհայտնվի Sotheby’s-ի աճուրդում

Sotheby’s աճուրդի տունը կրկին ներկայացնում է բացառիկ հնագիտական նմուշ․ աճուրդում կհայտնվի «Գաս» անունով տիրանոզավր ռեքսի կմախքը։

NPR-ի հաղորդմամբ՝ «Գասը» համարվում է երբևէ հայտնաբերված տիրանոզավրի ամենաամբողջական նմուշներից մեկը։ Դրա նախնական գնահատված գինը  կազմում է 20-30 միլիոն դոլար, իսկ մեկնարկային գինը՝ 19 միլիոն դոլար։

Կմախքը հայտնաբերվել է 2021 թվականին ԱՄՆ Հարավային Դակոտա նահանգում՝ մասնավոր տարածքում։ Պեղումները իրականացրել է հնագույն հանածոների որոնող Թոմաս Հեյթկամպի թիմը։ Մասնագետները շուրջ երեք տարի աշխատել են պեղումների վրա, իսկ հետագայում ևս երեք տարի պահանջվել է կմախքի մաքրման, վերականգնման և փաստաթղթավորման համար։

«Գասի» երկարությունը մոտ 11,5 մետր է, բարձրությունը՝ ավելի քան 3,8 մետր։ Գիտնականների գնահատմամբ՝ այն ապրել է մոտ 67 միլիոն տարի առաջ՝ ուշ կավճի շրջանում։

Դինոզավրի անունը ստացել է այն տարածքի նախկին սեփականատեր Գարի «Գաս» Լիքինգի պատվին, որտեղ հայտնաբերվել է կմախքը։

Աճուրդը կրկին քննարկումներ է առաջացրել հնէաբանների շրջանում՝ կապված այն հարցի հետ, թե նման գիտական արժեք ունեցող գտածոները պետք է պահպանվեն թանգարաններում, թե կարող են հայտնվել մասնավոր հավաքորդների ձեռքում։

Sotheby’s-ն առաջին անգամ դինոզավրի կմախք աճուրդի էր հանել 1997 թվականին։ Այդ ժամանակ «Սյու» անունով տիրանոզավրի կմախքը վաճառվել էր 8,4 միլիոն դոլարով։

Դինոզավրի հանածոյի վաճառքի ներկայիս ռեկորդը պատկանում է «Ապեքս» անունով ստեգոզավրին, որը 2024 թվականին Sotheby’s-ի աճուրդում վաճառվել էր 44,6 միլիոն դոլարով։ Եթե «Գասը» վաճառվի ավելի բարձր գնով, այն կարող է դառնալ պատմության ամենաթանկ վաճառված դինոզավրի կմախքը։