Դատարանը թույլատրել է Սերժ Սարգսյանին չմասնակցել դատական նիստերին

Հակակոռուպցիոն դատարանը բավարարել է ՀՀ երրորդ նախագահ Սերժ Սարգսյանի պաշտպան Ամրամ Մակինյանի միջնորդությունը, ինչի արդյունքում Սարգսյանը գործի քննության ընթացքում չի մասնակցի դատական նիստերին։

Պաշտպանը նշել է, որ Սերժ Սարգսյանը գտնվում է ազատության մեջ, ունի ընտրված պաշտպաններ և չի առարկում, որպեսզի դատական նիստերն անցկացվեն իր բացակայությամբ։ Նրա խոսքով՝ պաշտպանական կողմի դիրքորոշումն արդեն ձևավորված է, իսկ Սարգսյանի շահերը դատարանում ամբողջությամբ կներկայացնեն նրա պաշտպանները։

Միաժամանակ պաշտպանն ընդգծել է, որ Սերժ Սարգսյանը չի հրաժարվում իր դատավարական իրավունքներից և անհրաժեշտության դեպքում կներկայանա դատարան, եթե նրա մասնակցությունը պարտադիր համարվի։

Դատարանը բավարարել է միջնորդությունը՝ որոշելով, որ գործով գրավոր ապացույցների հետազոտման փուլում Սերժ Սարգսյանի ներկայությունը պարտադիր չէ։ Անհրաժեշտության դեպքում նա դատարան կհրավիրվի համապատասխան ծանուցմամբ։