Շոգի պատճառով Ֆրանսիան ժամանակավորապես դադարեցրել է 3 ատոմակայանի աշխատանքը

Ֆրանսիան ժամանակավորապես դադարեցրել է երեք միջուկային ռեակտորի աշխատանքը՝ երկրում շարունակվող ուժեղ շոգի պատճառով։

Euronews-ի հաղորդմամբ՝ պետական էներգետիկ ընկերությունը՝ EDF-ը, հայտնել է, որ ևս յոթ ռեակտոր կարող է աշխատել նվազեցված հզորությամբ։

Ընկերության պարզաբանմամբ՝ որոշումը պայմանավորված է շրջակա միջավայրի պաշտպանության պահանջներով։ Ատոմակայանները գետերի ջուրն օգտագործում են ռեակտորների հովացման համար, իսկ շոգ եղանակի պայմաններում ջրի ջերմաստիճանն արդեն բարձրացել է։ Այդ պատճառով անհրաժեշտ է խուսափել գետեր չափազանց տաք ջուր արտանետելուց։

EDF-ը նշել է, որ միջուկային անվտանգության որևէ վտանգ չկա, իսկ սահմանափակումները նպատակ ունեն պաշտպանել ջրային բուսականությունն ու կենդանական աշխարհը։

Դադարեցվել է Գոլֆեշի, Բյուգեի և Շոուզի ատոմակայանների երեք ռեակտորի աշխատանքը։ Ընկերության տվյալներով՝ դրանց ընդհանուր հզորությունը կազմում է մոտ 3,65 գիգավատ, ինչը Ֆրանսիայի միջուկային արտադրական հզորության մոտ 6 տոկոսն է։

Ֆրանսիայում սա վերջին շաբաթներին երկրորդ դեպքն է, երբ ծայրահեղ շոգի պատճառով EDF-ը ստիպված է լինում սահմանափակել ատոմակայանների աշխատանքը։ Երկիրը ներկայում գտնվում է հերթական շոգ ալիքի ազդեցության տակ, և շրջանների ավելի քան մեկ երրորդում հայտարարվել է բարձր ջերմաստիճանի վտանգի ամենաբարձր մակարդակ։