Ընթանում են ռուս խաղաղապահ զորախմբի ղեկավարի տեղակալի և հայ ակտիվիստների բանակցությունները

 Տեղ գյուղի մոտակայքում ընթանում է ռուս խաղաղապահ զորախմբի ղեկավար Անդրեյ Վոլկովի տեղակալի և հայ ակտիվիստների բանակցությունները: Հանդիպումը կազմակերպվել է նեղ կազմով, հայ ակտիվիստներից 4 ներկայացուցիչ է մասնակցում ռուս խաղաղապահների ներկայացուցչի հետ բանակցություններին: Քննարկվում են պայմանները, թե որ դեպքում և ինչ պայմաններում հայ ակտիվիստները կկարողանան անցնել և գնալ Արցախ:

 Նախաձեռնության հեղինակներից Հայկ Բարսեղյանն ավելի վաղ ասել էր․ «Տեղեկություններ կան, որ ռուս սահմանապահները, ավելին՝ ադրբեջանցիները թողնելու են անցնենք, բայց մենք պայման ունենք․ մենք պահանջելու ենք, որ ադրբեջանի «դերասանները» անցնեն ցանկապատի այն կողմը, ռուսները պատ կազմեն, և մենք առանց ուղեկցողների անցնենք»։
 

Հիշեցնենք՝ կեղծ բնապահպանական պատրվակներ ներկայացնելով՝ մի խումբ ադրբեջանցիներ Լաչինի միջանցքը փակ են պահում արդեն 2 շաբաթ։ Արցախը Հայաստանին կապող միակ ճանապարհի փակ լինելը հումանիտար խնդիրների պատճառ է դարձել․ Ստեփանակերտում նկատվում է սննդի, դեղորայքի, վառելիքի պակաս, ավելի քան 1000 արցախցիներ՝ այդ թվում երեխաներ, չեն կարողանում ՀՀ-ից վերադառնալ իրենց բնակավայրեր։