Եթե մենք ունենայինք ազգային իշխանություն, թշնամու կողմից Հայաստանի և Արցախի կյանքի ճանապարհը փակող ահաբեկչական «գորշ գայլերի» նշաններով ամբոխը արդեն կհայտնվեր միջազգային մեդիաներում։ Այս մասին ֆեյսբուքի իր էջում գրել է ադրբեջանագետ Անժելա Էլիբեգովան։

«Պաշտոնյաները իրենց միջազգային ռեսուրսները կօգտագործեին 120 հազար հայի կյանքի, տեղաշարժի ու անվտանգության իրավունքը խախտելու մասին բոլոր հարթակներում ահազանգելու համար։
Սա կլիներ ևս մի փաստարկ բանակցային գործընթացում, թե ինչու արցախահայությունը չի կարող ապրել Ադրբեջանի կազմում, ինչու է դա գոյաբանական խնդիր։

Կրկնվեմ, դժվար բան չկա, զուտ կամքի հարց ա»։

Հիշեցնենք, որ դեկտեմբերի 12-ին ժամը 10։30-ի սահմաններում, ադրբեջանական կողմը խախտելով 2020 թվականի նոյեմբերի 9-ի եռակողմ համաձայնագրի դրույթները, բնապահպանական պատճառաբանություններով փակել է Արցախը Հայաստանին կապող միակ ճանապարհը, ոտնահարելով քաղաքացիական բնակչության կենսական շահերն ու իրավունքները: