Սաուդյան Արաբիան հերքում է նավթի արդյունահանումը ավելացնելու ՕՊԵԿ+-ի պլանների մասին տեղեկությունները
Սաուդյան Արաբիայի էներգետիկայի նախարար արքայազն Աբդուլազիզ բեն Սալմանը հերքել է The Wall Street Journal-ի այն տեղեկությունները, որ ՕՊԵԿ+-ի երկրները քննարկում են նավթի արդյունահանումը օրական 500 հազար բարելով ավելացնելու հարցը։ Այս մասին հայտնում է ТАСС-ը՝ Սաուդյան Արաբիայի մամուլի գործակալությանը հղումով։
«Հայտնի փաստ է, որ ՕՊԵԿ+-ն իր հանդիպումներից առաջ որևէ որոշում չի քննարկում»,- պարզաբանել է նախարարը։
Նա նշել է, որ կազմակերպության կողմից ընդունված որոշումը նավթի արդյունահանումը օրական 2 մլն բարելով կրճատելու վերաբերյալ կտևի մինչև հաջորդ տարվա վերջ, և անհրաժեշտության դեպքում ՕՊԵԿ+-ը «միշտ պատրաստ կլինի» ձեռնարկել հետագա միջոցներ՝ արդյունահանումը նվազեցնելու, առաջարկը և պահանջարկը հավասարակշռելու համար:
Ավելի վաղ The Wall Street Journal-ը գրել էր, որ Սաուդյան Արաբիան և ՕՊԵԿ+-ի նավթ արտադրող մյուս երկրները քննարկում են արդյունահանումը օրական 500 հազար բարելով ավելացնելու հարցը։
