Ուկրաինայում զոհվել է Զամբիայի քաղաքացի, որը պատիժ էր կրում Մոսկվայում

Զամբիայի արտաքին գործերի նախարարությունը Facebook-ում հայտարարել է Ուկրաինայում իր քաղաքացու մահվան մասին։

Նշվում է, որ Զամբիայի քաղաքացի հանդիսացող 23-ամյա Լեմեհանի Նաթան Նիրենդան  իր կառավարության դրամաշնորհով Մոսկվայի ինժեներական ֆիզիկայի ինստիտուտում (MEPhI) միջուկային ֆիզիկա է սովորել, ապա դատապարտվել է ինը ու կես տարվա ազատազրկման, որից հետո մահացել է Ուկրաինայում 2022 թվականի սեպտեմբերի 22-ին։

«Նախարարությունը ցավով հայտնում է, որ 2022 թվականի նոյեմբերի 9-ին ծանուցվել է պարոն Նիրենդայի մահվան մասին Ռուսաստանի և Ուկրաինայի միջև հակամարտության ճակատում», - ասվում է նախարար Սթենլի Կակուբոյի հայտարարության մեջ:

Սոցցանցում հրապարակված հաղորդագրության համաձայն՝ Զամբիայի դիվանագիտական ​​ծառայությունը ստուգել է այս տեղեկատվության ճշգրտությունը և հաստատել Նիրենդայի մահվան փաստը։  Նախարարության տվյալներով՝ նրա աճյունը տեղափոխվել է Ռոստով՝ հետագայում Զամբիա հայրենադարձվելու համար։

Հայտարարության մեջ նշվում է նաև, որ Զամբիայի կառավարությունը խնդրել է Ռուսաստանի իշխանություններին տեղեկատվություն տրամադրել, թե ինչպես կարող էր իրենց երկրի քաղաքացին գտնվել ռուսական հատուկ գործողության գոտում և մահանալ Մոսկվայում պատիժը կրելիս։

Ռուսական իշխանությունների կողմից այս տեղեկատվության հաստատումն այս պահին չկա։

Սեպտեմբերի 30-ին Բաշկիրիայի խորհրդարանը Պետդումայի քննարկմանն է ներկայացրել օրինագիծ, ըստ որի՝ բանտարկյալները կկարողանան մասնակցել Ուկրաինայում ռազմական հատուկ գործողությանը։