ՏԵՍԱՆՅՈՒԹ․ Տանզանիայում մարդատար ինքնաթիռն ընկել է լիճը
Տանզանիայի Հանրային հեռարձակման կորպորացիան (TBC) հայտնել է, որ մարդատար ինքնաթիռը վթարի է ենթարկվել եվ ընկել Տանզանիայի Վիկտորիա լիճը՝ փորձելով վայրէջք կատարել Բուկոբա օդանավակայանում։
Առայժմ փրկվել է 15 մարդ, սակայն հայտնի չէ, թե քանի ուղեւոր է եղել Precision Air ինքնաթիռում եւ արդյո՞ք զոհեր կան։
Երկրի մայրաքաղաք Դար էս Սալաամից օդ բարձրացած ինքնաթիռը «այսօր առավոտյան փոթորիկի եւ հորդառատ անձրևների պատճառով ընկել է Վիկտորիա լիճը», հայտնում է TBC-ն։ Սոցիալական ցանցերում տարածված տեսանյութերն ու պատկերները ցույց են տալիս, որ ինքնաթիռը գրեթե ամբողջությամբ սուզվել է եւ տեսանելի է միայն կանաչ-շագանակագույն պոչը:
Փրկարարական նավակները ժամանել են դեպքի վայր, իսկ փրկարարները շարունակել են փրկել ինքնաթիռում արգելափակված մյուս ուղեւորներին։
Տանզանիայի նախագահ Սամիա Սուլուխու Հասանը կոչ է արել հանգստություն պահպանել, քանի որ փրկարարական գործողությունը շարունակվում է:
Բուկոբա օդանավակայանը գտնվում է Աֆրիկայի ամենամեծ Վիկտորիա լճի ափին։
