Բաց պատերազմ՝ Աֆղանստանի ու Պակիստանի միջև․ ռմբակոծվում է ռազմական օբյեկտներն ու «միջուկային կենտրոն»-ը

Աֆղանական ուժերը հարվածներ են հասցրել Պակիստանի տարածքում գտնվող ռազմական օբյեկտներին, որոնցից մեկը որոշ աղբյուրներ անվանում են «միջուկային կենտրոն»։ Այս մասին հաղորդել է Ariana News-ը՝ հղում անելով իր աղբյուրներին։

Նշվում է, որ հարվածները հասցվել են Խայբեր-Պախտունխվա նահանգի Կոկալ շրջանի ռազմական կենտրոնին, ինչպես նաև մեկ այլ ռազմավարական նշանակության օբյեկտի։

Հեռուստաալիքի փոխանցմամբ՝ հարյուրավոր զոհեր և վիրավորներ տեղափոխվել են Իսլամաբադի հիվանդանոցներ։ 

Հավելենք՝ ավելի վաղ հայտնել էինք Աֆղանստանի սահմանամերձ Նանգարհար, Նուրիստան, Կունար, Խոստ, Պակտիա և Պակտիկա նահանգներում Պակիստանի ուժերի հետ բախումների մասին։ Գիշերը Աֆղանստանի թալիբանյան իշխանությունները հայտարարել էին Դյուրանդի գծի երկայնքով պակիստանյան դիրքերին պատասխան հարված հասցնելու մասին՝ նշելով 55 պակիստանցի զինծառայողի զոհվելու մասին։

Պակիստանի վարչապետի արտաքին լրատվամիջոցների հարցերով խոսնակ Մոշարրաֆ Զայդին հայտնել է, որ զոհվել է 133 աֆղան թալիբ, ավելի քան 200-ը վիրավորվել են։ Նրա խոսքով՝ ոչնչացվել է 27 դիրք, ևս ինը՝ անցել Պակիստանի վերահսկողության տակ։ Պակիստանի պաշտպանության նախարար Խավաջա Ասիֆը ստեղծված իրավիճակը բնութագրել է որպես բաց պատերազմ։