Հնդկաստանում բժշկական ինքնաթիռ է կործանվել․ բոլոր ուղևորները զոհվել են

Հնդկաստանի Ջհարքհանդ նահանգում կործանվել է Redbird Airways ավիաընկերությանը պատկանող Beechcraft C90 տեսակի բժշկական ինքնաթիռը, ինչի հետևանքով զոհվել են օդանավում գտնվող բոլոր յոթ անձինք։ Տեղեկությունը հաղորդել է The Hindu պարբերականը՝ հղում անելով պաշտոնական աղբյուրներին։

Հնդկաստանի քաղաքացիական ավիացիայի գլխավոր վարչությունը (DGCA) հայտնել է, որ օդանավը փետրվարի 23-ին մեկնել էր Ռանչի քաղաքից դեպի Դելի։ Իրավապահ մարմինների փոխանցմամբ՝ ինքնաթիռը կործանվել է Ջհարքհանդի Չատրա շրջանի Կասարիա պանչայաթ բնակավայրի տարածքում։ Օդանավում գտնվել են երկու օդաչու և հինգ ուղևոր։

Ըստ նախնական տվյալների՝ օդանավը թռիչքից անմիջապես հետո խնդրել է թույլտվություն փոխել երթուղին՝ եղանակային պայմանների պատճառով։ Կարճ ժամանակ անց կապը օդանավի հետ ընդհատվել է։ Այն Դելի էր տեղափոխում միջին տարիքի տղամարդու, որը ստացել էր ծանր այրվածքներ։

Փրկարարական ծառայությունները հայտնաբերել են կործանման վայրը։ Զոհվածների թվում են երկու օդաչուները, երկու բուժաշխատողներ, հիվանդը և նրան ուղեկցող երկու անձինք։