Երևանում նախկին պլաստիկի գործարանի տարածքում այսօր բռնկված հրդեհը մեկուսացվել է։ Տեղեկությունը հայտնում է ՀՀ ԱԻՆ մամուլի ծառայությունը։

Ինչպես արդեն հայտնել էինք, որ այսօր` ժամը 08։30-ին, Ճգնաժամային կառավարման ազգային կենտրոն ահազանգ էր ստացվել, որ ծուխ է նկատվում Երևանի Արշակունյաց պողոտայի կիսակառույց շինությունից։ Դեպքի վայր էին մեկնել ԱԻՆ ՓԾ Երևան քաղաքի փրկարարական վարչության հրշեջ-փրկարարական ջոկատներից երեք մարտական հաշվարկ։

«Հրդեհը մեկուսացվել է ժամը 10։23-ին»,–նշված է ԱԻՆ հաղորդագրության մեջ։

Քիչ առաջ լրատվամիջոցներում տեղեկություններ տարածվեցին այն մասին, որ իբր  շտապօգնության բժիշկների հերթապահ խումբը տեղում մոտ 10 քաղաքացու առաջին բուժօգնություն է ցուցաբերել, քանի որ վերջիններիս ինքնազգացողությունը ծխի պատճառով վատացել է։

ԱԻՆ-ից Auroranews-ին հայտնեցին, որ տարածվող տեղեկությունները  իրականությանը չեն համապատասխանում։