Հանդիպել են ՀԱՊԿ անդամ երկրների արտգործնախարարները
ՀՀ արտաքին գործերի նախարար, ՀԱՊԿ-ում նախագահող Արարատ Միրզոյանի համակարգմամբ տեղի է ունեցել ՀԱՊԿ անդամ երկրների արտաքին գործերի նախարարների աշխատանքային հանդիպում, որն ավանդաբար անցկացվում է ՄԱԿ Գլխավոր ասամբլեայի շրջանակներում։ Այս մասին հայտնում է ԱԳՆ մամուլի ծառայությունը։
Հանդիպման ընթացքում ՀԱՊԿ անդամ երկրների արտգործնախարարները մտքեր են փոխանակել ՄԱԿ Գլխավոր ասամբլեայի 77-րդ նստաշրջանի օրակարգի շուրջ։ Նշվել է ՄԱԿ-ի շրջանակներում ՀԱՊԿ անդամ երկրների համագործակցության ամրապնդման կարեւորությունը։
Արարատ Միրզոյանը ներկայացրել է Հայաստանի Հանրապետության ինքնիշխանության եւ տարածքային ամբողջականության դեմ ադրբեջանական վերջին ագրեսիայի հետեւանքով ստեղծված իրավիճակը։
Հանդիպման ավարտին ՀՀ արտաքին գործերի նախարարը ՀԱՊԿ գործընկերներին ներկայացրել է Հայաստանի Հանրապետության Անկախության տոնին նվիրված լուսանկարների ցուցահանդեսը։
