«Այն, ինչ ասել է Պուտինը, շատ կարևոր է Արցախի համար». Ռուբեն Վարդանյան

Գործարար Ռուբեն Վարդանյանը ֆեյսբուքյան իր էջում տեղադրել է սեպտեմբերի 7-ին Վլադիվոստոկի ֆորումում Ռուսաստանի նախագահի ելույթից մեկ հատված և կից գրել․

«Այն, ինչ ասել է Պուտինը, շատ կարևոր է Արցախի համար: Միջազգային իրավունքում ազգերի ինքնորոշման իրավունքն առանցքային նորմ է, որի շուրջ էլ պետք է կառուցվի Արցախի հարցով ողջ հայկական դիվանագիտությունը:

Ակնհայտ է, որ Արցախի ինքնորոշումը 1991 թվականին իրականացվել է միջազգային իրավունքի հիման վրա եւ միջազգային իրավունքի բոլոր սկզբունքների պահպանմամբ։ Եվ այստեղ որեւէ հակասություն չկա տարածքային ամբողջականության սկզբունքի հետ։ Այդ մասին փաստել է ՄԱԿ-ի Արդարադատության միջազգային դատարան Կոսովոյի գործով 2010թ. խորհրդատվական եզրակացության մեջ։

Արցախի պարագայում ինքնորոշման իրավունքն Արցախի ժողովրդի ապրելու իրավունքն է, քանի որ այլընտրանքը էթնիկ զտումն է, եւ ադրբեջանական պաշտոնական լրատվամիջոցներով այդ մասին բացահայտ սպառնալիքներ են հնչում:

Ցավոք, Հայաստանի իշխանությունները շարունակում են դիվանագիտական գործընթացում մոռացության մատնել ժողովուրդների իրավահավասարության եւ ինքնորոշման սկզբունքի գերակայությունը եւ շատ լավ է, որ Նիկոլ Փաշինյանն անձամբ լսեց դրա կարեւորության մասին։

Արցախում բնակվող ժողովրդի՝ սեփական որոշմամբ իրենց կյանքը շարունակելու անքակտելի իրավունքը երբեք չի կարող վիճարկվել», - գրել է Ռուբեն Վարդանյանը: