ՏԵՍԱՆՅՈՒԹ․ Բերդյանսկի կենտրոնում պայթյուն է որոտացել․ կատարվածը ահաբեկչություն է որակվել
Քիչ առաջ պայթյուն է տեղի ունեցել Բերդյանսկի քաղաքային վարչությունում։ Պայթյունը տեղի է ունեցել երեքշաբթի օրը Բերդյանսկի վարչական շենքի մոտ՝ Ռուսաստանի կողմից վերահսկվող Զապորոժիեի շրջանում, հայտնել է շրջանի ՆԳՆ-ն։
«Պայթյունը որոտացել է Բերդյանսկի վարչական շենքի մոտ։ Մանրամասները ճշտվում են», -հաղորդում է ոստիկանության հեռագրային ալիքը, փոխանցում է interfax.ru-ն։
Մարզային վարչակազմի գլխավոր խորհրդի անդամ Վլադիմիր Ռոգովը Telegram-ի իր ալիքում մանրամասնել է, որ պայթյունը տեղի է ունեցել քաղաքի կենտրոնական հատվածում։ Տեսանյութ է հրապարակվել, որտեղ երեւում է, թե ինչպես է բարձրանում ծուխը։
Թելեգրամ ալիքներն էլ հայտնում են, որ պայթել է Բերդյանսկի հրամանատարի մեքենան։
«Պայթեցված մեքենայում եղել է Բերդյանսկի հրամանատարը. նա ծանր վիրավորվել է»։
Ինչպես հայտնում է «Main in Berdyansk»-ը, նա արդեն տեղափոխվել է հիվանդանոց։ Բացի այդ, ինչպես հայտնում են շրջանի իշխանությունները, պայթյունից անմիջապես հետո փոխհրաձգություն է տեղի ունեցել։
