«Ես ոնց կարող եմ այդ հարցերին պատասխանել». Արցախի ՆԳ նախարար
Այսօր՝ սեպտեմբերի 2-ին, Ստեփանակերտում լրագրողների հետ զրույցում Արցախի ՆԳ նախարար Կարեն Սարգսյանը, անդրադառնալով ՊԲ նախկին հրամանատար Միքայել Արզումանյանի կալանավորմանը, որը մեղադրվում է Շուշին հանձնելու մեջ, նշեց.
«Որպես անձ ճանաչում եմ, նորմալ զինվորական է»:
Անդրադառնալով Արցախը Հայաստանին կապող նոր ճանապարհին, Սարգսյանն ասաց, որ այս ճանապարհը, իր տեղեկությամբ գործելու է մինչեւ մայիս, նոր ճանապարհ է կառուցվում, որի աշխատանքներն սկսվել են: Հարցին, թե որոշակի անվտանգության երաշխիքներ ստացե՞լ եք Ադրբեջանից, որ այդ ճանապարհն անվտանգ է լինելու, նա պատասխանեց.
«Այդ հարցն ուղղված է խաղաղապահի զորքերի ղեկավարությանը, ես ոնց կարող եմ այդ հարցերին պատասխանել, ես միայն ներքին անվտանգության մասին կարող եմ խոսել»:
Ինչ վերաբերում է Արցախում տիրող տրամադրություններին, ըստ որի, մարդիկ հույս են կապում Ռուսաստանին միանալու հետ, Կարեն Սարգսյանն ասաց.
«Մենք այստեղ ապրելով, Արցախը պետք է լինի հայեցի, ոչ մեկի հետ հույս չենք կապում: Իսկ Հայաստանի հետ խնդիր չենք տեսնում, մենք միասնական ենք: Իմ ոլորտի մասով կարող եմ ասել, որ Հայաստանի իմ կոլեգաների հետ համագործակցությունը բարձր մակարդակի վրա, ինչի համար շնորհակալ եմ: Կարծում եմ՝ ամեն բան լավ է լինելու, եթե լինենք միասնական»:
