«ԱՄՆ-ն, Մեծ Բրիտանիան և Եվրոպան անամոթաբար շանտաժի են դիմում». Լավրով

Ռուսաստանի արտաքին գործերի նախարար Սերգեյ Լավրովը հայտարարել է Ռուսաստանի նկատմամբ այլ երկրների դիրքորոշման վրա ազդելու և Մոսկվայի նկատմամբ նրանց վերաբերմունքը փոխելու՝ Արևմուտքի փորձերի մասին: Այս մասին նա խոսել է «Զվեզդա» հեռուստաալիքին տված հարցազրույցում: Տեղեկատվությունը փոխանցում է Lenta.ru-ն:

Լավրովի խոսքով՝ ԱՄՆ-ն, Մեծ Բրիտանիան և Եվրոպան անամոթաբար շանտաժի են դիմում՝ ստիպելով երկրներին փոխել իրենց կարծիքը Ռուսաստանի մասին։ 

«Դա պետք է փոխվի, քանի որ այդ պետությունների ճնշող մեծամասնությունը կա՛մ արդարացված է համարում մեր վերաբերմունքը անվտանգության ոլորտում Ռուսաստանի օրինական անվտանգության շահերի Արևմուտքի կողմից երկարաժամկետ անտեսմանը, կա՛մ նրանք ցանկանում են չեզոք դիրք գրավել»,- պարզաբանել է Լավրովը։

Արտգործնախարարը նաև նշել է, որ արևմտյան երկրները մյուս պետություններին ստիպում են հետևել հակառուսական կուրսին՝ սահմանափակել արտահանումը, ներմուծումը, դադարեցնել տրանսպորտային կապերը։ Նրա խոսքով` որոշ երկրներ ստիպված են գնալ որոշակի զիջումների, սակայն գործնականում «նրանցից ոչ մեկը չի միանում պատժամիջոցներին»։ Միաժամանակ այս պետությունների վրա ճնշումները շարունակվում են։

Այս հարցազրույցում Լավրովն ասել է նաև, որ բազմաբևեռ աշխարհի դարաշրջանի գալուստն անխուսափելի է` չնայած Արևմուտքի խոչընդոտներին։ Մասնավորապես, ԱՄՆ-ն ու Մեծ Բրիտանիան, ըստ նրա, փորձում են դեմ գնալ օբյեկտիվ պատմական գործընթացներին։ Նախարարն ընդգծել է, որ դա կարող է դանդաղեցնել բազմաբևեռության ձևավորումը, բայց ոչ կասեցնել այն։