«Մենք ՌԴ-ի կողմից Ղրիմի բռնակցումը համարում ենք անօրինական և հակասահմանադրական». Էրդողանի հայտարարությունը
Թուրքիան չի ճանաչում Ռուսաստանի կողմից Ղրիմի անօրինական բռնակցումը ինչպես իրավական, այնպես էլ բարոյական պատճառներով։ Այս մասին հայտարարել է Թուրքիայի առաջնորդ Ռեջեփ Թայիփ Էրդողանը` ելույթ ունենալով Ղրիմի պլատֆորմի գագաթնաժողովում։
«Մենք Ղրիմի բռնակցումը համարում ենք անօրինական և հակասահմանադրական։ Սա է մեր սկզբունքային դիրքորոշումը բարոյական և իրավական տեսակետից։ Միջազգային իրավունքը պահանջում է, որ Ղրիմը վերադարձվի Ուկրաինային: Սա շատ կարևոր է ողջ տարածաշրջանի և համաշխարհային անվտանգության համակարգի համար՝ կայունության, Ուկրաինայի տարածքային ամբողջականությանն աջակցելու, նրա ինքնիշխանության, քաղաքական համակարգի համար»,- ասել է Էրդողանը։
Թուրքիայի նախագահն ընդգծել է, որ պատերազմը պետք է ավարտվի արդար խաղաղությամբ՝ հիմնված Ուկրաինայի տարածքային ամբողջականության և ինքնիշխանության վրա։ Նրա խոսքով, Անկարան գործադրում է բոլոր ջանքերը՝ այդ նպատակին հասնելու համար արդյունավետ դիվանագիտական ալիք ստեղծելու համար։
Նախօրեին Թուրքիայի նախագահ Ռեջեփ Թայիփ Էրդողանը հայտարարել էր, որ ծրագրում է հանդիպում կազմակերպել նախագահ Վլադիմիր Զելենսկու և Ռուսաստանի առաջնորդ Վլադիմիր Պուտինի միջև։ Նա կոնկրետ ժամկետներ չի նշել, սակայն վստահեցրել է, որ բանակցությունները կարող են տեղի ունենալ «մոտ ապագայում»։
