«Գիտակցաբար ենք դա արել, չենք հերքում». ԱԻ նախարարը` «Սուրմալուում» տարվող աշխատանքների մասին
Առավոտյան 8։30-ից մեկնարկել են որոնողափրկարարական աշխատանքները։ Այս մասին այսօր լրագրողների հետ ճեպազրույցում ասաց ՀՀ ԱԻ նախարար Արմեն Փամբուխչյանը նշելով, որ այդ աշխատանքները տարվում են ենթադրվող էպիկենտրոնային գոտում։
Անդրադառնալով անհետ կորած քաղաքացիների հարազատների վրդովմունքին՝ նախարարը նշել է.
«Ձեռքով ենք աշխատել, չենք օգտագործել ծանր տեխնիկա, որպեսզի չվնասենք ողջ մնացածներին կամ զոհվածների մարմինները. գիտակցաբար դա արել ենք, չենք հերքում»:
Նախարարն ասաց, որ ըստ տեղեկությունների այդ հատվածում պայթյունի պահին քաղաքացի է եղել։
«Շինության հետ կապված հարցերը կքննարկվեն ինժեներական աշխատանքների ավարտից հետո»,-ասաց Արմեն Փամբուխչյանը՝ հավաստիացնելով, որ որևէ մարդկային ուժի, տեխնիկայի, մասնագիտական գիտելիքի պակաս այս օրերին չի եղել, որևէ երկրից օգնություն խնդրելու կարիք չի եղել։
Հիշեցնենք՝ «Սուրմալու» առևտրի կենտրոնում հրդեհի բռնկումից և պայթյունից հետո՝ 49 ժամվա ընթացքում, մեկուսացվել է կրակը, իսկ 4 ժամ անց՝ 53 ժամ հետո, հրդեհը մարվել է, ժամանակ առ ժամանակ իրականացվել են հովացման աշխատանքներ։
