Բաքուն սպասում է «Զանգեզուրի միջանցքի» երթուղուն. Ալիև

Բաքուն առաջիկա շաբաթներին հայկական կողմից սպասում է «Զանգեզուրի միջանցքի» երթուղուն: Նման հայտարարություն է արել Ադրբեջանի նախագահ Իլհամ Ալիևը:

«Մենք պետք է խաղաղ բանակցություններ սկսենք Հայաստանի հետ: Առայժմ մենք դրական պատասխան չենք ստացել, բայց հուսով եմ, որ մենք կստանանք այն։ Պետք է ստեղծել դելիմիտացիայի հանձնաժողով։ Նրանք դեմ էին դրան, բայց ի վերջո համաձայնեցին։ «Զանգեզուրի միջանցք» է պետք, բայց նրանք դրան էլ էին դեմ։ Հիմա առաջիկա շաբաթներին նրանցից սպասում ենք «Զանգեզուրի միջանցքի» երթուղուն»,-ասել է նա: 

Ադրբեջանի նախագահի խոսքով՝ Հայաստանի և Ադրբեջանի միջև հարաբերությունների կարգավորման գործընթացում Ղարաբաղի թեման չկա:

«...Հայաստանին դա չի վերաբերում։ Դա մեր ներքին գործն է։ Այսօր բանակցությունների սեղանի շուրջ ընդհանրապես որևէ կարգավիճակի մասին խոսք չկա: Ղարաբաղում ապրող հայերը ո՛չ կարգավիճակ, ո՛չ անկախություն, ո՛չ էլ հատուկ արտոնություններ չեն ունենա։ Նրանք լինելու են Ադրբեջանի նույն քաղաքացիները»,-հայտարարել է Ալիևը։