Պուտին - Էրդողան հանդիպումն ավարտվել է. համատեղ հայտարարություն է ստորագրվել

Սոչիում ավարտվել է Ռուսաստանի Դաշնության նախագահ Վլադիմիր Պուտինի և Թուրքիայի նախագահ Ռեջեփ Թայիփ Էրդողանի հանդիպումը, որը տևել է մոտ 4 ժամ, իսկ արդյունքներով ստորագրվել է համատեղ հայտարարություն:

Ռուսական լրատվամիջոցները հրապարակում են հանդիպման արդյունքներից մանրամասներ: 

Նշվում է, որ Պուտինն ու Էրդողանը պայմանավորվել են մեծացնել Ռուսաստանի և Թուրքիայի միջև առևտրի ծավալը, ավելացնել երկրների փոխգործակցությունը տրանսպորտի, արդյունաբերության, գյուղատնտեսության և շինարարության ոլորտներում։ 

Թուրքիան համաձայնել է ռուսական գազի դիմաց վճարել ռուբլով: Բացի դա, կողմերը ընդգծել են Ստամբուլի հացահատիկի գործարքի լիարժեք իրականացումն ապահովելու անհրաժեշտությունը:

Բարձր մակարդակի համագործակցության խորհրդի հաջորդ նիստը տեղի կունենա Թուրքիայում։

Ավելի վաղ, ՌԴ նախագահի խոսնակ Դմիտրի Պեսկովը հայտնել էր, որ Պուտին-Էրդողան հանդիպման օրակարգում, ի թիվս այլ հարցերի, Լեռնային Ղարաբաղի հակամարտության հարցն է: 

[4497ebf76b21d8ce86f62e04dbd66247.jpg]

[61d1dc23deb96e0f07b62b8a5f706f2d.jpg]