«ՆԱՏՕ-ի անդամներ, մի՛ ամաչեք Ռուսաստանի վերաբերյալ դրույթներ ձևակերպելիս». Զելենսկու գրասենյակ
Ուկրաինան քայլեր չի ձեռնարկի ՆԱՏՕ-ին անդամակցելու համար, քանի որ դաշինքի անդամները մերժել են նրա նկրտումները, Financial Times-ին տված հարցազրույցում ասել է Ուկրաինայի նախագահ Զելենսկու գրասենյակի ղեկավարի տեղակալ Իգոր Ժովկվան։ Այս մասին հայտնում է РИА Новости-ն:
Պաշտոնյան խոստովանել է, որ Կիևի միանալը ռազմական դաշինքին հնարավոր չէ կարճաժամկետ հեռանկարում, սակայն հույս է հայտնել, որ ՆԱՏՕ-ն կհաստատի գործընկերությունը։
Ժովկվան նաև կոչ է արել ՆԱՏՕ-ին Մադրիդում կայանալիք գագաթնաժողովում ճանաչել Ուկրաինայի կենտրոնական դերը եվրոպական անվտանգության մեջ։ Դաշինքի անդամների հանդիպման ժամանակ նախատեսվում է որոշել կազմակերպության ռազմավարական զարգացման ուղղությունը, և Զելենսկու գրասենյակի ներկայացուցիչը դաշինքից պահանջել է հեռացնել Ռուսաստանի՝ որպես ռազմական դաշինքում գործընկերոջ ցանկացած հիշատակում և խիստ նախազգուշացում տալ։
«Մի՛ ամաչեք. սա իմ կոչն է ՆԱՏՕ-ի անդամներին Ռուսաստանի վերաբերյալ դրույթներ ձևակերպելիս»,- հավելել է պաշտոնյան։
