Հայտնի է` երբ Լավրովը կայցելի Հայաստան
ՌԴ արտաքին քաղաքական գերատեսչության պաշտոնական ներկայացուցիչ Մարիա Զախարովան հայտարարել է, որ Ռուսաստանի արտաքին գործերի նախարար Սերգեյ Լավրովը Հայաստան կայցելի։
«Հունիսի 10-ին Ռուսաստանի արտգործնախարարը Երևանում կմասնակցի ՀԱՊԿ արտգործնախարարների խորհրդի հերթական նիստին», – այսօրվա ճեպազրույցում ասել է Զախարովան:
Նա հիշեցրել է, որ այս տարի ՀԱՊԿ–ը նախագահում է Հայաստանը։ Նիստի մասնակիցներն ամփոփելու են ՀԱՊԿ շրջանակում բազմակողմ համագործակցության արդյունքները և անդրադառնալու են հետագա փոխգործակցության հեռանկարին։ Քննարկելու են, թե ինչպես է միջազգային, տարածաշրջանային իրադրությունն ազդում կազմակերպության անդամ պետությունների վրա, խոսելու են ՀԱՊԿ ճգնաժամային արձագանքման մեխանիզմի կատարելագործման մասին։
Վերջինիս խոսքով ՝ ստորագրվելու է արտաքին քաղաքականության, պաշտպանության և անվտանգության հարցերի շուրջ խորհրդակցությունների ծրագիրը: Նախատեսվում են նաև մի շարք երկկողմ հանդիպումներ:
