«Դեռ փախած եք»․ Տարոն Չախոյանը պատասխանել է Սաղաթելյանին

Վարչապետի աշխատակազմի ղեկավարի տեղակալ Տարոն Չախոյանը անդրադարձել է Իշխան Սաղաթելյանի հայտարարությանը։ Նա գրել է․

«Իշխան Սաղաթելյանի մոտ հիշողության ակնհայտ խանգարումներ են նկատվում։

Ֆրանսիայի հրապարակից քիչ առաջ հայտարարել է՝

«Տղա են, թող գան․․․ եկող շաբաթ իշխանությանը հրավիրում ենք խորհրդարան՝ արտահերթ նիստի»։

Համացանցում՝ ոստիկանությունից փախչող վազքի չեմպիոնի մեմ դարձած Իշխան Սաղաթելյանը հավանաբար մոռացել է մայիսի 4-ի ԱԺ նիստը, երբ իր խմբակցությունն ու ընդդիմադիր գործընկերները փախան նիստերի դահլիճից։

Իշխանությունն այսօր էլ կգնա խորհրդարան, իսկ դուք մայիսի 4-ից դեռ փախած եք»,- գրել է Չախոյանը։

Հիշեցնենք, որ այսօր Սաղաթելյանը, անդրադառնալով հարցին՝ ընդդիմությունը խորհրդարան չի գնում կամ չի մասնակցում կառավարության հետ հարցուպատասխանին, ասել է․

«Մենք խորհրդարան կվերադառնանք մեր օրակարգով և հաջորդ շաբաթ պահանջելու ենք արտահերթ նիստ։ Երեկոյան մանրամասն կխոսեմ այդ մասին։ Այժմ հայտարարում եմ` տղա են, թող գան։ Իշխանությանը հրավիրում եմ խորհրդարան, բայց մեր օրակարգով, ոչ թե իրենց կեղծ ու շինծու օրակարգով»։