Լավրովը հայտնել է, թե որն է Մոսկվայի առաջնահերթ նպատակը
Ռուսաստանը հետաքրքրված է նրանով, որ ռուս-ուկրաինական առաջիկա բանակցություններն արդյունավետ լինեն։ Այս մասին հայտնել է ՌԴ արտաքին գործերի նախարար Սերգեյ Լավրովը սերբական ԶԼՄ-ներին տված հարցազրույցում։ Լավրովը հայտնել է, որ բանակցությունների ընթացքում Մոսկվայի առաջնահերթ նպատակը երկար ժամանակ գնդակոծությունների ենթարկված Դոնբասում մարդկանց տառապանքներին վերջ դնելն է։
«Բանակցությունների նպատակն է դադարեցնել Դոնբասում խաղաղ բնակիչների սպանությունը, որը շարունակվում էր 8 տարի, և որի մասին արևմտյան առաջադեմ հանրությունը լռում էր՝ ոչ մի անգամ քննադատող մեկնաբանություններ չանելով… Մենք պարտավոր ենք անել այնպես, որ Ուկրաինան դադարի լինել մի երկիր, որը մշտապես ռազմականացնում են և փորձում են այնտեղ տեղակայել հարվածային զենքեր, որոնք սպառնում են Ռուսաստանի Դաշնությանը», – ասել է Լավրովը։
Ինչ վերաբերում է Ռուսաստանի և Ուկրաինայի նախագահներ Վլադիմիր Պուտինի և Վլադիմիր Զելենսկու հանդիպմանը, ապա ըստ Լավրովի՝ այդ հանդիպումն արդյունավետ չի լինի, եթե դրա նպատակը լինի միայն կարծիքների փոխանակումը։ Նա նշել է, որ Պուտինի և Զելենսկու հանդիպումը անհրաժեշտ կլինի, հենց հստակություն հայտնվի Ռուսաստանի համար առանցքային բոլոր հարցերի հանգուցալուծման առումով։
