Վրաստանում «երկրորդ ճակատ» բացելու անհրաժեշտության մասին Ուկրաինայի ազգային անվտանգության խորհրդի քարտուղար Ալեքսեյ Դանիլովի հայտարարությունը վրդովմունքի ալիք է առաջացրել Թբիլիսիում ՝ թե՛ իշխող կուսակցության, թե՛ ընդդիմության շրջանում․ գրում է Sputnik Գրուզիան։ 
«Ուկրաինայի Անվտանգության խորհրդի քարտուղարը կոչ է անում Վրաստանին (և մյուսներին) հրաժարվել տարածքային ամբողջականության խաղաղ վերականգնման քաղաքականությունից և բացել մեր քաղաքների և գյուղերի ավերման երկրորդ ճակատը, որպեսզի վրացի կանայք և երեխաները մահանա՞ն։ Ճի՞շտ է»,- ասել է խորհրդարանի արտաքին հարաբերությունների հանձնաժողովի նախագահ Նիկոլոզ Սամխարաձեն։ 
Ընդդիմադիր «Գիրչի» կուսակցության անդամ, պատգամավոր Սանդրո Ռակվիաշվիլիի կարծիքով՝ «հայտարարությունը անհանդուրժելի է»: 
Վրաստանի խորհրդարանական մեծամասնության անդամ Միխայիլ Սարջվելաձեն նշել է, որ հայտարարությունը տհաճ տպավորություն է թողել, քանի որ պատերազմի ընդլայնումը և ռազմաճակատների բացումը անցանկալի են բոլորի համար: 
Ուկրաինայի ազգային անվտանգության խորհրդի քարտուղար Ալեքսեյ Դանիլովի նշած «երկրորդ ճակատների» թվում է նաև Լեռնային Ղարաբաղը։
 

Հիշեցնենք այսօր Ուկրաինայի Ազգային անվտանգության և պաշտպանության խորհրդի քարտուղար Ալեքսեյ Դանիլովը հայտարարել էր, որ այլ երկրների տարածքում, այդ թվում՝ Ղարաբաղում լրացուցիչ ճակատների բացումը Ուկրաինային մեծապես կօգնի պայքարել ռուսական հարձակման դեմ։