Ինչպես ավելի վաղ հայտնի էր դարձել` Ռուսաստանից արգելվել է հացահատիկային մշակաբույսերի արտահանումը ԵԱՏՄ երկրներ՝ Հայաստան, Բելառուս, Ղազախստան, Ղրղզստան։ Արգելքը սահմանված է մինչև  օգոստոսի 31-ը և տարածվում է ցորենի, տարեկանի, գարու, եգիպտացորենի և ևս մի քանի անուն ապրանքատեսակների վրա։

Գաղտնիք չէ, որ Հայաստանը տնտեսաառևտրային ամուր կապերով  կապված է Ռուսստանի, ինչպես նաև Ուկրաինայի հետ:

Auroranews.am-ը ուսումնասիրել է 2021 թվականի առաջին կիսամյակում Հայաստան կատարված ներմուծումների տվյալները, որոնք հրապարակված են Պետական եկամուտների կոմիտեի պաշտոնական կայքում: 

Այսպես,  Արտաքին տնտեսական գործունեության ապրանքային անվանացանկի (ԱՏԳ ԱԱ) դասակարգիչներն համադրելով  ներմուծման երկիր-ապրանք տվյալների հետ` առանձնացրել ենք մի քանի պարենային ապրանքներ և ուսումնասիրել, թե որ երկիրն է հանդիսանում նշված ապրանքի` դեպի Հայաստան ամենամեծ մատակարարը, ինչ ծավալներով ենք նշված ապրանքատեսակները ներկրում Ռուսասստանից կամ Ուկրաինայից, ինչ այլընտրանքային ներկրման տարբերակներ ունենք, բացի վերոնշյալ երկրները:

Ցորեն

2021 թվականի առաջին կիսամյակում ցորեն ներկվրել է Ռուսաստանից և Վրաստանից: Ներկրման առյուծի բաժինը`  62.456 տոննա, Հայաստանը ներկրել է ՌԴ-ից:  Վրաստանից նույն ժամանակահատվածում ներկրել ենք 2.550 տոննա:
 

Արևածաղկի, քրքումի կամ բամբակի ձեթ 

Պարենային մյուս ամենակարևոր ապրանքատեսակի` ձեթի ներկրման հարցում ևս մեծապես կախում ունենք Ռուսաստանից:  2021 թվականի առաջին կիսամյակում ներկրել ենք 12. 041 տոննա ձեթ: Երկրորդ երկիրը, որից մեծ խմբաքանակ ենք ներկրում` Ուկրաինան է` մոտ 200 տոննա:

Հաջորդիվ` Իտալիան է, որտեղից ներկրվել է 19 տոննա, Կիպրոսից` 12, Բելառուսից` 2 տոննա: 

Թռչնի միս, մսամթերք

Այստեղ առաջատարի դիրքում Ուկրաինան է`  6.320 տոննա, երկրորդ տեղում Ռուսաստանն է` 2.508 տոննա, Բրազիլիայից` 1.415, ԱՄՆ-ից`  876, Գերմանիայից` 765, Միացիալ թագավորությունից` 526, Բելառուսից` 133 տոննա:

Մարգարին

Ամենաշատը մարգարին կամ մարգարինի հումք ներկրում ենք Ռուսաստանից` 7.290 տոննա, Ուկրաինայից` 892 տոննա: Ավելի փոքր ծավալով ներկրում ենք Իտալիայից` 154, Բելգիայից` 70, Վրաստանից` 13 և Գերմանիայից` 4 տոննայի չափով:  

Հաց, հրուշակեղեն 

Ալյուրից պատրաստված հացի, հրուշակեղենի ներկրման պատկերն էլ հետևյալն է. 69 տոննա` Բելառուս, 29 տոննա` Բուլղարիա, Բելգիա` 3, Թուրքմենստան`  6, Գերմանիա`  5, Դանիա` 2 տոննա:

Գազ` բնական և հեղուկ

Բնական և հեղուկ գազի ներկրումը կազմակերպվում է հիմնականում Իրանից և Ռուսաստանից: 2021 թվականի առաջին կիսամյակում 176. 760 հազ.խմ, ՌԴ-ց` 1.150.901 հազ.խմ:

Այսպիսով, ՀՀ մաքսային վիճակագրությունից պարզ է դառնում, որ Հայաստանը պարենային, առաջնային մի շարք ապրանքների մեծածավալ ներմուծումն իրականացնում է ՌԴ-ից, որոշ դեպքերում էլ Ուկրաինայից:

Խուճապային գնումներն ու դրա հետևանքները

Երեկվանից տարբեր տեղեկություններ են ստացվում Հայաստանում և Վրաստանում իրականացվող «խուճապային» գնումների մասին: Аuroranews.am-ը ահազանգ է ստացել այն մասին, որ մարդիկ փորձել են պարկով այլուր գնել, սակայն վաճառակետերում հրաժարվել են վաճառել` նշելով, թե առկա չէ:

 Այսօր` մարտի 11-ին, «Քաղաքացիական պայմանագիր» խմբակցության պատգամավոր Բաբկեն Թունյանը հավաստիացրել է, որ ոչ միայն Հայաստանը, այլ նաև ԵԱՏՄ անդամ մյուս երկրներն արդեն գնել են 2021-2022թթ. համար անհրաժեշտ ցորենի պաշարներ, չկան օբյեկտիվ հիմքեր մեր բնակչության շրջանում խուճապի տարածման համար:
 

Հավելենք, որ նման իրավիճակի ականատես եղանք 2020 թվականի մարտին, երբ երկրում կորոնավիրուսային առաջին ալիքը տարածվեց: Մարդիկ սկսել էին «խուճապային» գնումներ իրականացնել: 

Հիշեցնենք, որ ՀՀ վարչապետ Նիկոլ Փաշինյանը հորդորում էր քաղաքացիներին «խուճապային» գնումներ չիրականացնել, քանի որ դա կհանգեցնի մթերքի և այլ ապրանքների գնաճին: