Հունիսի 1-ին ՆԳՆ-ն երեխաներին հրավիրում է մեծ տոնախմբության․ անակնկալներ, շոուներ և նվերներ

Հունիսի 1-ին՝ Երեխաների պաշտպանության միջազգային օրը, Ներքին գործերի նախարարությունը հրավիրում է մասնակցելու ուրախ, գունեղ և հետաքրքիր տոնական միջոցառման։ ՀՀ ներքին գործերի նախարարությունն այդ մասին հաղորդագրություն է տարածել։

«Միջոցառումը կմեկնարկի ժամը 11։00-ին՝ ՆԳՆ փրկարար ծառայության հրապարակում (Դավթաշեն, 4-րդթաղամաս, Անաստաս Միկոյան փողոց 109/8)։

Փոքրիկներին սպասվում են բազմաթիվ անակնկալներ, ճանաչողական և իրազեկող խաղեր, թեմատիկ մրցույթներ, հետաքրքիր առաջադրանքներ, նվերներ ու լուսանկարման անկյուն։

«Փոքրիկ ոստիկան», «Փոքրիկ փրկարար» և «Փոքրիկ քաղաքացի» ինտերակտիվ գոտիներում երեխաները հնարավորություն կունենան մասնակցելու տարբեր ծրագրերի, իրենց ուժերը կփորձեն թեմատիկ «Այլ կերպ» ինտելեկտուալ խաղում, կծանոթանան նոր կենսաչափական անձնագրին և առաջին անգամ անձնագրավորման գործընթացին։

Տոնական մթնոլորտը կապահովեն սիրված մուլտհերոսները, փորձառու խաղավարները, կլինեն նաև փրփուրե և փուչիկների շոուներ, ավազով նկարչություն, ակվագրիմ, բատուտ և շրջիկ գնացք։

Եկե՛ք միասին ստեղծենք մանկության ամենագեղեցիկ հիշողությունները և տոնենք երեխաների օրը ժպիտներով և հետաքրքիր անակնկալներով»,- ասված է հաղորդագրության մեջ։ 

Հիշեցնենք՝ Երեխաների պաշտպանության միջազգային օրը՝ հունիսի 1-ին՝ ժամը 11։30-19։00-ն, երթևեկությունը դադարեցվելու է Տերյան և Պուշկինի փողոցների՝ Հյուսիսային պողոտային հարող հատվածներում։

Հավելենք՝  Հունիսի 1-ի միջոցառումներով պայմանավորված՝ մայիսի 31-ին՝ ժամը 24:00-ից մինչև հունիսի 1 ժամը 23:00 սահմանափակվելու է երթևեկությունը  Աջափնյակ վարչական շրջանում՝ Չավուշի հրապարակում, մասնավորապես, Բաշինջաղյան, Մազմանյան և Բեկնազարյան փողոցներում։