ՏԵՍԱՆՅՈՒԹ․ Լիբանանը ենթարկել է ամենադաժան ռմբակոծություններից մեկին․ բնակիչներին տարհանում են

Իսրայելի զինված ուժերը լայնամասշտաբ օդային հարվածներ են հասցրել Լիբանանի հարավում գտնվող Տյուրոս քաղաքին, որի հետևանքով իրավիճակը տարածաշրջանում կտրուկ սրվել է: Ռմբակոծության ընթացքում արկերից մեկը պայթել է քաղաքի հյուսիսային մասում գտնվող «Հիրամ» բժշկական կենտրոնի անմիջական հարևանությամբ:

Լիբանանի առողջապահության նախարարության փոխանցմամբ՝ պայթյունի ալիքից զգալիորեն տուժել են հիվանդանոցի վիրահատարաններն ու հիվանդասենյակները: Նախնական տվյալներով՝ բուժհաստատության տարածքում վիրավորվել է առնվազն 13 բժշկական աշխատակից:

Ստեղծված իրավիճակին հեռուստատեսային ուղերձով արձագանքել է Լիբանանի վարչապետ Նավաֆ Սալամը: Կառավարության ղեկավարը դատապարտել է Իսրայելի գործողությունները՝ որակելով դրանք որպես «այրված հողի» մարտավարություն և հավաքական պատժի կիրառում երկրի ժողովրդի նկատմամբ:

Զուգահեռաբար, Իսրայելի պաշտպանության բանակի պաշտոնական ներկայացուցիչ Ավիչայ Ադրաին հանդես է եկել հայտարարությամբ՝ կոչ անելով տեղի բնակչությանը հապաղ տարհանվել: Զինվորականները պահանջել են Զահրանի գետից հարավ ընկած շրջանների բնակիչներից անհապաղ տեղափոխվել երկրի հյուսիսային հատվածներ՝ նշելով, որ ռազմական գործողությունների գոտում մնալը վտանգավոր է կյանքի համար: