Ուկրաինան զանգվածային հարձակում է սկսել՝ ՌԴ-ում գտնվող ռազմական և արդյունաբերական օբյեկտների վրա․ Զելենսկի

Ուկրաինայի զինված ուժերը հեռահար հարվածներ են հասցրել Ռուսաստանի Դաշնության տարածքում գտնվող մի շարք ռազմական և արդյունաբերական օբյեկտների։ Այս մասին հայտարարել է Ուկրաինայի նախագահ Վլադիմիր Զելենսկին՝ նշելով, որ թիրախների թվում եղել են Սարատովի նավթավերամշակման գործարանը և Կասպից ծովում տեղակայված ռազմական հենակետը։

Ըստ Ուկրաինայի ղեկավարի՝ ռազմաճակատի գծից շուրջ 700 կիլոմետր հեռավորության վրա գտնվող Սարատովի գործարանի ուղղությամբ իրականացված գործողությունը նշանակալի արդյունք է, որն անվանվել է «Ուկրաինայի հեռահար պատժամիջոցներ»։ Բացի այդ, ԱԹՍ-ների հարվածներ են գրանցվել նաև Ռոստովի և Կիրովի մարզերում:

Նախագահական հայտարարության համաձայն՝ երկրի պաշտպանական ուժերը հեռահար առաջադրանքները կատարում են նախապես հաստատված պլանի համաձայն։ Վերջին մեկ շաբաթվա ընթացքում ուկրաինական անօդաչու թռչող սարքերը թիրախներ են խոցել նաև պետական սահմանից 300-ից մինչև 1200 կիլոմետր հեռավորության վրա գտնվող Յարոսլավլի, Ռյազանի, Վորոնեժի, Վոլգոգրադի, Նովգորոդի, Նիժնի Նովգորոդի մարզերում և Կրասնոդարի երկրամասում։

Իրականացված գործողությունների համար Վլադիմիր Զելենսկին շնորհակալություն է հայտնել Ուկրաինայի զինված ուժերին, Անվտանգության ծառայությանը և հետախուզական մարմիններին։