Մեզ վրա հարձակվեն՝ պատերազմն այլ ընթացք կստանա․ Լուկաշենկոյի կոշտ ուղերձը՝ Զելենսկուն

Աստանայում ընթացող ԵԱՏՄ գագաթնաժողովի շրջանակում Բելառուսի նախագահ Ալեքսանդր Լուկաշենկոն անդրադարձել է Ուկրաինայի իշխանությունների կողմից հնչող հայտարարություններին, որոնք վերաբերում են բելառուսական տարածքում գտնվող 500 հնարավոր թիրախների նշանառությանը։ Լուկաշենկոն նշել է, որ պաշտոնական Մինսկը ևս ունի հստակ կոորդինատներով սահմանված թիրախներ, որոնք գտնվում են երկրի սահմաններին բավականին մոտ, և ուկրաինական կողմը քաջ տեղյակ է այդ մասին։

Բելառուսի ղեկավարի գնահատմամբ՝ Ուկրաինայի բանակի հրամանատարությունը տարբերվում է քաղաքական ղեկավարության դիրքորոշումից և չի ցանկանում պատերազմական գործողությունների մեջ ներքաշվել Մինսկի հետ։ Ըստ նրա՝ զինվորականները գիտակցում են, որ Բելառուսի հետ 1500 կիլոմետր երկարությամբ բարդ սահմանը լրացուցիչ ճակատի վերածելը չի բխում Կիևի շահերից։ Լուկաշենկոն հավելել է, որ սահմանի հակառակ կողմում հիմնականում տեղակայված են տարածքային պաշտպանության ուժերն ու զորահավաքով ներգրավված քաղաքացիները։

Անդրադառնալով Ուկրաինայի նախագահ Վլադիմիր Զելենսկու քաղաքականությանը՝ Լուկաշենկոն ենթադրել է, որ նման հայտարարությունները հնչում են եվրոպական գործընկերների ճնշման ներքո։ Նա նաև զգուշացրել է, որ ցանկացած տարածքից Բելառուսի վրա ռազմական հարձակում գործելու դեպքում ուկրաինական հակամարտությունը կստանա բոլորովին այլ բնույթ ու որակ։ Խոսելով Ուկրաինայի նախագահի էմոցիոնալ վիճակի մասին՝ Բելառուսի ղեկավարը նշել է, որ պատերազմական ծանր պայմաններում ստեղծված ճնշումը կարող է ազդել նմանօրինակ հայտարարությունների վրա։