Նորվեգիա, Նիդեռլանդներ, Լատվիա. մի շարք երկրներ կոչ են անում իրենց քաղաքացիներին շտապ լքել Ուկրաինայի տարածքը

Այս պահին Նիդեռլանդները, Հարավային Կորեան, Լատվիան, Չեռնոգորիան և Մեծ Բրիտանիան կոչ են անում իրենց քաղաքացիներին շտապ լքել Ուկրաինայի տարածքը։

Նորվեգիայի ԱԳՆ-ն նույնպես իր քաղաքացիներին խորհուրդ է տվել լքել Ուկրաինան՝ այս երկրում ստեղծված իրավիճակը անվանելով «լուրջ և անկանխատեսելի»։ Այս մասին հայտնում է РИА Новости-ն։

«ԱԳՆ-ն խորհուրդ չի տալիս Նորվեգիայի քաղաքացիներին որևէ նպատակով մեկնել Ուկրաինա, ինչպես նաև խնդրում է այս երկրում գտնվող նորվեգացիներին լքել այն»,- ասվում է հաղորդագրության մեջ։ 

Նորվեգացիներին նաև խորհուրդ է տրվել չգտնվել Ռուսաստանի տարածքում՝ Ուկրաինայի սահմանից 250 կիլոմետր հեռավորության վրա:
 

Բացի այդ, ԱԳՆ-ն խորհուրդ է տվել չայցելել նաև Բելառուս՝ բացառությամբ Մինսկի։ Այս տարածքներում գտնվողներին խնդրել են հետևել իրավիճակին և դիմել համապատասխան բաժին՝ հեռանալու հարցում օգնություն ստանալու համար: