Ռուսաստանին լուրջ հետևանքներ են սպասվում Ուկրաինա «ներխուժման» դեպքում. Ջոնսոն և Զելենսկի

Ռուսաստանին լուրջ հետևանքներ են սպասվում Ուկրաինա «ներխուժման» դեպքում, հայտարարել են Մեծ Բրիտանիայի վարչապետ Բորիս Ջոնսոնը և Ուկրաինայի նախագահ Վլադիմիր Զելենսկին, գրում է Kp.ru-ն։
 

«Առաջնորդները զգուշացրել են, որ Ռուսաստանի ցանկացած ներխուժում Ուկրաինա կլինի մեծ ռազմավարական սխալ և կունենա լուրջ հումանիտար հետևանքներ։ Ուկրաինան և Մեծ Բրիտանիան պայմանավորվել են միասին աշխատել՝ ուժեղացնելու Ուկրաինայի անվտանգությունն ու իրեն պաշտպանելու կարողությունը»,- նշվում է քաղաքական գործիչների համատեղ հայտարարության տեքստում, որը հրապարակվել է Մեծ Բրիտանիայի վարչապետի գրասենյակի կայքում։
 

Ջոնսոնի և Զելենսկու հանդիպման ժամանակ բրիտանական կառավարության ղեկավարն ասել է, որ Լոնդոնը լրացուցիչ 88 միլիոն ֆունտ կուղարկի Կիև՝ ռուսական էներգակիրներից կախվածությունը նվազեցնելու համար։
 

Ավելի վաղ Միացյալ Թագավորության արտաքին գործերի նախարար Էլիզաբեթ Թրասը սպառնացել էր Ռուսաստանին ամենախիստ պատժամիջոցներով, եթե վերջինս «ներխուժի» Ուկրաինա։ Նրանք առաջարկում են, մասնավորապես, սառեցնել ռուսական ընկերությունների ակտիվները Մեծ Բրիտանիայում։