Արտակարգ դեպք Երևանում. թանգարանների պահպանության շենքի մոտ հայտնաբերվել են մարտական նռնակներ

Այսօր՝ դեկտեմբերի 10-ին, արտակարգ դեպք է տեղի ունեցել Երևանում: Ժամը 08:00-ի սահմաններում Արտակարգ իրավիճակների նախարարության փրկարար ծառայության  911 ճգնաժամային կառավարման կենտրոն ահազանգ է ստացվել, որ Թաիրով փողոցում՝  «Պատմամշակութային արգելոց-թանգարանների և պատմական միջավայրի պահպանության ծառայություն»  պետական ոչ առեվտրային կազմակերպության վարչական շենքի մոտ մարտական նռնակներ են հայտնաբերվել: 

Նմանատիպ մեկ այլ ահազանգ էլ ստացել է ՀՀ ոստիկանության պարեկային ծառայության Երևանի գնդում: Ինչպես հայտնում է shamshyan.com-ը, օպերատիվորեն ժամանել են պարեկային ծառայության Երևանի գնդի 1-ին գումարտակի 2-րդ վաշտի պարեկները՝ գումարտակի հրամանատար Արամ Դադոյանի, վաշտի հրամանատար Նիկոլայ Ավետիսյանի գլխավորությամբ: Մինչ պարեկները սահմանազատել էին նշված վայրը, տեղում ավագ պարեկ Դավիթ Սիմոնյանն ու պարեկ Գևորգ Մարդոյանը, զննելով դեպքի վայրը, քիչ այն կողմ դարձյալ հայտնաբերեցին մարտական նռնակ: Նշված վայրը նույնպես պարեկները սահմանազատեցին: