ԲՀԿ-ն իշխանության հետ կոալիցիա կկազմի՞. Արման Աբովյանը պատասխանում է

Իշխանական ուժն, անգամ վարչական ռեսուրս կիրառելով, մի շարք համայնքներում պարտվեց։ «Փաստինֆո»-ի հետ զրույցի ժամանակ արձանագրեց ԱԺ նախկին պատգամավոր, ԲՀԿ-ական Արման Աբովյանը։

Վերջինս նշեց, որ գործող իշխանությունները փորձում էին ինչ-որ բան անել, սակայն մարդկանց վրա ճնշում գործադրելը հակառակ ազդեցություն ունեցավ։

Ընտրության օրը Աբովյանում ՔՊ-ական ավագանու թեկնածու Անահիտ Մկրտչյանի աբովյանցիներին ուղարկած նամակներին, որով ոչ միայն նախընտրական քարոզչությամբ էր զբաղվում՝ հորդորելով մասնակցել ընտրություններին և հիշեցնում քվեաթերթիկում իրենց համարը,այլ նաեւ, ըստ էության, զգուշացնում, որ ընտրություններին իրենց մասնակցությունը կարող են ստուգել, ինչին արձագանքելով Արման Աբովյանը նշեց, որ եթե հանցագործության հատկանիշներ կան, ապա իրավապահները պետք է զբաղվեն դրանով։

«Տեղեկությունը հանրային է և այն պետք է հիմք հանդիսանա, որ իրավապահները գործողություններ անեն։ Չգիտեմ իրավապահներին դիմել են, թե ոչ, բայց այդ փաստն անպայման պետք է ստուգվի»,-նշեց Արման Աբովյանը։

Աբովյանում ՏԻՄ ընտրությունների նախնական արդյունքով հաղթել է «Բարգավաճ Հայաստան» կուսակցությունը՝ հավաքելով 46.19 տոկոս ձայն, սակայն ավագանիում մեծամասնություն կազմելու համար պետք է կոալիցիա կազմի այլ ուժերի հետ։

Արման Աբովյանը նշեց, որ ինչպես քաղաքապետի իրենց թեկնածու Էդուարդ Բաբայանն է հայտարարել, իշխանության հետ կոալիցիա կազմելու մասին խոսք գնալ չի կարող։

«Մնացածն էլ կտեսնենք։ ՔՊ-ն բացառվում է»,-նշեց Աբովյանը։