Զանգվածային ցույցերի ֆոնին Թուրքիայում քրգործեր են հարուցվել գրառումներ արած 271 օգտատիրոջ դեմ
Թուրքիայի անվտանգության գլխավոր վարչությունը քրեական գործեր է հարուցել ազգային արժույթի՝ լիրայի անկումից հետո սոցիալական ցանցերում փողոցային բողոքի ակցիայի կոչեր հնչեցնելու դեպքերի առնչությամբ: Այս մասին հայտնում են թուրքական լրատվամիջոցները:
Նշվում է, որ քրգործեր են հարուցվել սոցիալական ցանցերում գրառումներ արած 271 օգտատերերի դեմ:
Ինչպես հայտնել էինք, թուրքական լիրայի անկումից հետո Ստամբուլում, Անկարայում և մի շարք այլ քաղաքներում բողոքի ակցիաներ էին իրականացվել: Մասնակիցները պահանջում էին կառավարության հրաժարականն ու իշխանությունից «Արդարություն և զարգացում» կուսակցության հեռացումը:
Թուրքական լիրան նոյեմբերի 23-ին գրանցել է անկման հերթական ռեկորդը. մեկ դոլարի համեմատ լիրան արժեզրկվել է՝ հասնելով 13․5-ի: Վերջին մեկ տարում լիրան արժեզրկվել է մոտ 45 տոկոսով:
