«Երուսաղեմում տեղ չկա պաղեստինցիներին սպասարկող ամերիկյան հյուպատոսության համար»

Իսրայելն ուժեղացրել է իր հակազդեցությունն ԱՄՆ նախագահ Ջո Բայդենի վարչակազմի կողմից Երուսաղեմում պաղեստինցիների համար ԱՄՆ հյուպատոսությունը վերաբացելու ծրագրի դեմ՝ առաջարկելով, որ նման առաքելությունը պետք է լինի Արևմտյան ափում: 

Ինչպես գրում է Reuters-ը, Իսրայելի վարչապետ Նաֆթալի Բենեթը և արտգործնախարար Յաիր Լապիդը բողոքել են պաղեստինցիներին սպասարկելու համար Երուսաղեմում ԱՄՆ հյուպատոսության բացման դեմ։ 

«Երուսաղեմում տեղ չկա ամերիկյան հյուպատոսության համար, որը սպասարկում է պաղեստինցիներին։ Երուսաղեմն Իսրայել պետության միակ մայրաքաղաքն է»,- ասել է Բենեթը Լապիդի հետ համատեղ մամուլի ասուլիսում։ 

«Եթե ամերիկացիները ցանկանում են հյուպատոսություն բացել Ռամալլահում, մենք դրա հետ ոչ մի խնդիր չունենք... Երուսաղեմում ինքնիշխանությունը պատկանում է միայն մեկ երկրի՝ Իսրայել պետությանը»,- իր հերթին ասել է Լապիդը։ 

Հայտնի է, որ ԱՄՆ նախկին նախագահ Դոնալդ Թրամփի օրոք Վաշինգտոնն ուրախացրել էր իսրայելցիներին և զայրացրել պաղեստինցիներին՝ ԱՄՆ դեսպանատունն Իսրայելում Թել Ավիվից տեղափոխելով Երուսաղեմ: 

Պաղեստինցիները ցանկանում են, որ Արևելյան Երուսաղեմը լինի իրենց ապագա պետության մայրաքաղաքը և, ուստի դեսպանատունը Երուսաղեմ տեղափոխելու ԱՄՆ-ի նախաձեռնությունը համարում են այդ ձգտումը խաթարող: Իսրայելը, որը գրավել է Արևելյան Երուսաղեմը 1967 թվականին, Երուսաղեմն անվանում է իր անբաժանելի մայրաքաղաքը։ 

Պաղեստինցիների հետ կապերը շտկելուն ձգտող Բայդենի վարչակազմը հայտարարել է, որ կվերաբացնի հյուպատոսությունը, թեև ժամկետ չի նշել: 

Մինչդեռ Պաղեստինի նախագահ Մահմուդ Աբասի խոսնակը հայտարարել է.«Մենք կընդունենք միայն ԱՄՆ հյուպատոսությունը Երուսաղեմում՝ Պաղեստինի պետության մայրաքաղաքում: Դա այն էր, ինչ ԱՄՆ վարչակազմը հայտարարել էր և պարտավորվել էր անել»: