Սաակաշվիլին դիմել է Վրաստանին ու հիշել Հայաստանն ու Փաշինյանին

Տեղական ինքնակառավարման մարմինների ընտրությունների արդյունքները զայրացրել են Վրաստանի երրորդ նախագահ Միխեիլ Սաակաշվիլիին։ Նա օրինակ է բերել հայ ժողովրդին և Հայաստանի վարչապետ Նիկոլ Փաշինյանին:

Սաակաշվիլին Facebook-ի իր էջում գրել է, որ իրեն նվաստացած է զգում, սաստիկ զայրացած է, և նման զգացողություն պետք է ունենա իրեն հարգող ցանկացած վրացի։ Նախկին նախագահը հորդորել է տապալել գործող իշխանությանը և պատասխանատվության ենթարկել պաշտոնյաներին։

«Այդպես վարվեց մեր հարևան Հայաստանը։ Փաշինյանը պայքարում էր Իվանիշվիլիի տրամաչափի չորս օլիգարխի դեմ։ Այնտեղ նույնպես կեղծեցին ընտրությունները, բայց հայ ժողովուրդը, միևնույնն է, հաղթեց», - նշել է Սաակաշվիլին։

Նրա խոսքով` Հայաստանում մարդիկ փողոց դուրս եկան և բողոքեցին այնքան ժամանակ, մինչև բանդիտական կառավարությունը կոտրվեց, և արտահերթ ընտրություններ նշանակվեցին։ Սաակաշվիլին կարծում է, որ նման բան պետք է տեղի ունենա նաև Վրաստանում։

Երեկ Վրաստանում անցկացվել է տեղական ինքնակառավարման մարմինների ընտրությունների երկրորդ փուլը. ԿԸՀ-ի նախնական տվյալներով՝ 20 համայնքներից 19-ում հաղթել են «Վրացական երազանք-ժողովրդավարական Վրաստան» իշխող կուսակցության թեկնածուները: Թեև իշխանության կուսակցությունը երկրորդ փուլում կենտրոնացրել էր բոլոր ռեսուրսները, այդուհանդերձ կարողացավ հաղթել շատ քիչ տարբերությամբ։

Հիշեցնենք` Ուկրաինայի քաղաքացի Միխեիլ Սաակաշվիլին Վրաստանում հեռակա կարգով դատապարտվել է բանկիր Սանդրո Գիրգվլիանիի սպանության և պատգամավոր Վալերի Գելաշվիլիին ծեծի ենթարկելու գործով: Առաջինով նա դատապարտվել է 3 տարվա, երկրորդով՝ 6 տարվա ազատազրկման։ Բացի այդ, Սաակաշվիլին ներգրավված է 2007թ․-ի նոյեմբերի 7-ին ընդդիմադիր հանրահավաքը ցրելու, «Իմեդի» հեռուստաալիքում իրականացված հարձակման և պետբյուջեի միջոցների մսխման գործերով։ Այդ գործերը դատարանները դեռ քննում են, դատավճիռներ առայժմ չեն կայացվել։