Արտախորհրդարանական ուժերի հետ հանդիպման ժամանակ ՀՀ վարչապետը հայտնել է, թե ինչու մինչ օրս 44-օրա պատերազմի քննիչ հանձնաժողովը չի ստեղծվել

Արտախորհրդարանական քաղաքական ուժերի հետ հանդիպման ժամանակ ՀՀ վարչապետ Նիկոլ Փաշինյանը հայտնել է, թե ինչու մինչ օրս 44-օրա պատերազմի քննիչ հանձնաժողովը չի ստեղծվել։ Կառավարության ֆեյսբուքյան էջում տեսանյութ է հրապարակվել, որտեղ այդ մասին մանրամասներ կան։

«Այսօր դե յուրե քննիչ հանձնաժողով դեռ ստեղծված չէ, ինչը կախված է նաև այն հանգամանքից, որ այդ հանձնաժողովի գործունեությւոնը կարող է 6 ամիս և +6 ամիս լինել։ Հետևաբար, մեկնարկը պետք է լավ նախապատրաստելուց հետո տալ, որպեսզի այդ ժամկետի մեջ տեղավորվենք»,–ասում է Փաշինյանը։

Մյուս կողմից, ըստ նրա, եթե պարզվի` այդ ժամկետի մեջ աշխատանքները չեն տեղավորվում, ստիպված կլինեն օրենսդրական փոփոխություններ կատարել ևս 2 վեց ամիսներ ավելացնելու նկատառումով։

Փաշինյանը հիշեցրել է, որ քննիչ հանձնաժողով ստեղծելու մասին հայտարարվել է ամիսներ առաջ, սակայն քանի որ արտախորհրդարանակն ուժերի ներկայացուցիչներ են մասնակցելու, զոհվածների ծնողներից են մասնակից լինելու, անհրաժեշտ է ճիշտ ձևակերպումներ անել։