Ալեն Սիմոնյանը՝ հոկտեմբերի 27-ի մասին

ՀՀ ԱԺ նախագահ Ալեն Սիմոնյանի կարծիքով՝ հոկտեմբերի 27-ի հիմնական պատճառները, հիմնական մասնակիցներն ու այն հարցերը, որ բաց են մնացել, հանրությունը գիտի:

«Մենք բոլորս այդ հարցերի պատասխանները կստանանք նաև իրավական առումով», - լրագրողների հետ զրույցում ասաց նա:

Սիմոնյանը նշեց, թե այսօր էլ վտանգներ տեսնում է: Ինչ վերաբերում է մեղավորներին պատժելուն՝ նա ասաց, թե ինքը պաշտոնյա է ու իրավունք չունի որևիցե հայտարարություն անել, որը կարող է իր մեջ մեղադրանք պարունակել ու հետագայում կարող է ազդել իրավական պրոցեսների վրա:

«Բնական է, հիմնական դերակատարները պատժված են, նրանք գտնվում են բանտում, ու մենք այսօր խնդիր ունենք՝ հասկանալու պատճառներն ու այն դրդողներին, այն մարդիկ, ովքեր այդ ամենից քաղաքական շահ են ունեցել, իսկ այդ մարդկանց շահագրգռվածությունը մեր հանրությունը գիտի ու ես չեմ կարծում, որ ես իրավասու եմ հիմա բարձրաձայնել այդ մասին», - ասաց ԱԺ նախագահը:

Հարցին՝ Մեղրիի փոխանակման հետ կապ ունե՞ր հոկտեմբերի 27-ի ոճրագործությունը, Սիմոնյանն արձագանքեց. «Չեմ բացառում, իմ կարծիքն է, ես չեմ բացառում, որ այն իրավիճակը, որ մենք ունենք՝ պատերազմի հետ կապված, սկսվել է հենց հոկտեմբերի 27-ին, որովհետև, եթե չլիներ հոկտեմբերի 27, մենք այսօրվան չէինք գա»:

Ալեն Սիմոնյանը վստահեցրեց՝ ամեն ինչ անելու են, որ հոկտեմբերի 27-ի պատվիրատուները հայտնվեն ճաղերի հետևում: