ՏԵՍԱՆՅՈՒԹ. Ձախորդ գողերը. ավտոտնակի դուռը լինգով բացելիս բռնվել էին

Մայիսի 7-ին, ժամը 1-ի սահմաններում, ոստիկանության Մուշի բաժնի ծառայողները գիշերային շրջայցի ժամանակ նկատել էին, որ երկու երիտասարդ լինգով փորձում են բացել Բուլվարային թաղամասի ավտոտնակներից մեկի դուռը: 

Ոստիկանությունից հայտնում են, որ երկուսին էլ բռնել էին և, գողություն կատարելու կասկածանքով, բերման ենթարկել ոստիկանության Մուշի բաժին:

Երիտասարդները Գյումրիի 8-րդ զինվորական թաղամասի բնակիչ էին, մեկը`18, մյուսը՝ 20 տարեկան: 

Անձնական խուզարկությամբ 20-ամյա երիտասարդի ուսապարկից հայտնաբերվեցին ձեռնոց, դանակ, գործիքներ, հարմարեցված բանալի, բջջային հեռախոս ու բանկային քարտ: 

Նախապատրաստված նյութերն ուղարկվել են տարածքային քննչական բաժին: