ԵՄ-ն երկարաձգել է Մերձավոր Արևելքի օդային տարածքի վերաբերյալ սահմանափակումները։

Եվրոպայի ավիացիոն անվտանգության գործակալությունը (EASA) մինչև հուլիսի 1-ը երկարաձգել է Մերձավոր Արևելքի հակամարտության գոտու օդային տարածքում չվերթեր չկատարելու վերաբերյալ ավիաընկերություններին տրված հանձնարարականների գործողությունը։

Ինչպես հայտնում է «Արմենպրես»-ը, գործակալության հաղորդագրության մեջ նշվում է, որ հակամարտության գոտիների վերաբերյալ տեղեկատվական տեղեկագրի գործողության ժամկետը երկարաձգվել է մինչև 2026 թվականի հուլիսի 1-ը։

Բարձր ռիսկի գոտու կարգավիճակը շարունակում է գործել Բահրեյնի, Իրանի, Իրաքի, Իսրայելի, Հորդանանի, Քուվեյթի, Լիբանանի, Օմանի, Կատարի, Արաբական Միացյալ Էմիրությունների և Սաուդյան Արաբիայի օդային տարածքների համար։

EASA-ն նաև նշել է, որ ԱՄՆ-ի և Իրանի միջև հրադադարի համաձայնագրի կարճաժամկետ խախտումները դեռևս հնարավոր են, հատկապես Հորմուզի նեղուցի և հարակից օդային տարածքի շրջանում։