Նկատում ենք և՛ Բաքվի, և՛ Երևանի ցուցաբերած կառուցողական վերաբերմունքը. Զախարովա
Ռուսաստանի արտաքին գործերի նախարարության պաշտոնական ներկայացուցիչ Մարիա Զախարովան ամենշաբաթյա ճեպազրույցի ժամանակ անդրադարձել է Ադրբեջանի նախագահ Իլհամ Ալիևի վերջին՝ Զանգեզուրի տրանսպորտային միջանցքի ստեղծման մասին հայտարարությանը:
«Մենք, ընդհանուր առմամբ, նկատում ենք և՛ Բաքվի, թե՛ Երևանի ցուցաբերած կառուցողական վերաբերմունքը Ռուսաստանի, Ադրբեջանի և Հայաստանի փոխվարչապետների նախագահությամբ եռակողմ աշխատանքային խմբի շրջանակներում: Դրա հիմնական խնդիրն է տարածաշրջանում ամենաբարձր մակարդակով իրականացնել բոլոր տնտեսական և տրանսպորտային կապերի ապաշրջափակման վերաբերյալ ձեռք բերված պայմանավորվածությունները:
Մենք ակնկալում ենք, որ փոխադարձ ընդունելի շփման կետերի որոնման վրա նույն ուշադրությունը գերակշռելու է ինչպես պաշտոնական մեկնաբանություններում, այնպես էլ Ադրբեջանի և Հայաստանի մեդիատիրույթում»,- մասնավորապես ասել է Զախարովան:
Դիտարկմանը, թե Ալիևը, մասնավորապես, ասել է՝ Ադրբեջանը, Թուրքիան և Իրանը ընդհանուր դիրքորոշում ունեն տարածաշրջանում տրանսպորտային նախագծերի իրագործման հարցի շուրջ, Զախարովան ասել է հետևյալը. «Տարօրինակ կլինի, եթե ես մեկնաբանեմ Ադրբեջանի նախագահի հայտարարությունը: Մենք որոշակի հարաբերություններ ունենք այդ պետության հետ, այդ թվում՝ տնտեսական ոլորտում»:
