Ստեփանակերտում հայկական դրոշները չեն փոխարինվել ռուսականով. ArmDaily

«Նախօրեին Ստեփանակերտում քաղաքի մուտքից մինչև եղբայրական գերեզմանատուն տանող ճանապարհին հայկական դրոշները փոխարինվել են ռուսականով»,- այս մասին այսօր Ազգային ժողովի իր ելույթի ժամանակ հայտարարեց անկախ պատգամավոր Արման Բաբաջանյանը։

ArmDaily.am-ը կապ հաստատեց Ստեփանակերտ՝ պարզելու՝ արդյո՞ք Բաբաջանյանի հայտարարությունը համապատասխանում է իրականությանը, թե ոչ։

Արցախի Հանրապետության ԱԺ Արտաքին հարաբերությունների մշտական հանձնաժողովի նախագահ, ՀՅԴ Արցախի Կենտրոնական կոմիտեի անդամ Վահրամ Բալայանը   լրատվականի հետ զրույցում տեղեկացրել է, որ անձամբ ինքը Ստեփանակերտում նման բանի ականատես չի եղել՝ տեսել է միայն հայկական դրոշները։

Լրատվամիջոցը կապ է հաստատել  նաև Ստեփանակերտի բնակիչ Ժիրայր Ավետիսյանի հետ, ով ևս հավաստիացրել է, որ բոլոր պետական հիմնարկների դիմաց Արցախի և Հայաստանի դրոշներն են, իսկ ռուսական դրոշներ տեղադրված են համապատասխան վայրերում։

ԱՀ Ազգային ժողովի Գիտության, կրթության, մշակույթի, երիտասարդության և սպորտի հարցերի մշտական հանձնաժողովի նախագահ Արամ Հարությունյանը ևս ժխտել է հայկական դրոշները հավաքելու ու դրանք ռուսական դրոշներով փոխարինելու մասին հայտարարությունը։

«Արման Բաբաջանյանի ասածն իրականությանը չի համապատասխանում, որովհետև ոչ թե հայկական դրոշներն են փոխարինում ռուսականով, այլ որոշ տեղերում ավելացվել են նաև ռուսական դրոշներ, մասնավորապես պրն Բաբաջանյանի նշված հատվածից քիչ հեռու տեղակայված է ռուս խաղաղապահների անցակետը՝ դրա համար էլ դրոշներ են տեղադրվել։ Հայկական դրոշները ռուսականով չեն փոխարինվել՝ նման բան չկա»,-ասել է Հարությունյանը։