«Իշխանափոխությունից հետո անպայման պետք է իրականացվի քննություն եւ տրվի բոլոր հարցերի պատասխանները, այդ թվում՝ ՀԱՊԿ-ի գրության. Վանեցյան

Չի կարող հայ մարդը խոսել Հայ առաքելական սուրբ եկեղեցու մասին նման ոճի մեջ։ Այս մասին այսօր՝ դեկտեմբերի 27-ին, Սուրբ Գայանե եկեղեցու բակում լրագրողների հետ զրույցում ասաց «Հայրենիք» կուսակցության ղեկավար Արթուր Վանեցյանը։

«Հայ առաքելական Սուրբ եկեղեցին մեր ազգի եւ հայապահպանության կենտրոնն է եղել դարեր ի վեր։ Ցանկացած հայ մարդ պարտավոր է խոնարհումով եւ նվիրումով հետեւել Հայ առաքելական Սուրբ եկեղեցուն։ Ես այսօր այստեղ եմ ինչպես եւ միշտ, ցանկացած կիրակի՝ որպես հավատացյալ մարդ այցելում եմ եկեղեցի։ Այսօր որոշել ենք այցելել Սուրբ Գայանե եկեղեցի»,- նշեց Արթուր Վանեցյանը։

Անդրադառնալով սեպտեմբերի 1-ին՝ ՀԱՊԿ գլխավոր քարտուղարի կողմից ԱԽ քարտուղարին ուղղված նամակին, բովանդակությանը՝ Վանեցյանն ասաց.

«Ես բազմիցս նշել եմ, որ վերջին պատերազմի հետ կապված պատերազմի սկսելու, ընթացքի եւ ավարտի հետ հանրությունը պետք է ստանա հստակ պատասխաններ։ Հստակ պատասխանները ենթադրում են քրեական գործի շրջանակներում իրականացվող քննություն։Ես համոզված եմ, որ այս իշխանությունների օրոք այդ քննությունն օբյեկտիվ եւ արդարացի չի իրականացվի, ուստի իշխանափոխությունից հետո անպայման պետք է իրականացվի քննություն եւ տրվի բոլոր հարցերի պատասխանները, այդ թվում՝ ՀԱՊԿ-ի գրության»։

Հիշեցնենք, որ Միքայել Մինասյանը հայտարարել էր, որ պատերազմից 26 օր առաջ ՀԱՊԿ գլխավոր քարտուղար Զասը նամակ է գրել ՀՀ ԱԽ քարտուղար Արմեն Գրիգորյանին եւ կցել փաստաթղթերի փաթեթ, որտեղ առաջարկում է ՀԱՊԿ շրջանակներում անցկացնել ռազմական շտաբային զորավարժություններ. «Նա նկարագրում է այն պատերազմը, որին պետք է պատրաստվի Հայաստանը եւ կոչ է անում ՀՀ-ին դիմել ՀԱՊԿ-ին պատերազմ սկսվելուց առաջ, որովհետեւ ըստ այդ փաստաթղթի, Հայաստանը անկարող էր դիմանալ այն պատերազմին, որը նկարագրված էր այդ գաղտնի նամակում»:

Հայտարարությունից հետո Միքայել Մինասյանը հրապարակել էր նաեւ ՀԱՊԿ քարտուղարի գաղտնի նամակը ՀՀ անվտանգության խորհրդի քարտուղարին։