Դատարանը քննում է Առուշ Առուշանյանի կալանքի միջնորդությունը
Երևանի ընդհանուր իրավասության դատարանում այս պահին քննվում է Գորիսի քաղաքապետ Առուշ Առուշանյանի կալանքի միջնորդությունը։ Այս մասին ArmDaily.am-ի հետ զրույցում ասաց Գորիսի փոխհամայնքապետ Իրինա Յոլյանը։
Միաժամանակ, փաստաբանական թիմը բողոքարկել է Առուշանյանի ձերբակալման որոշումը։ Առուշ Առուշանյանը ձերբակալվել է ՀՀ Քր.օրենսգրքի 34 և 225.1 հոդվածով՝ ապօրինի հավաք կազմակերպելու փորձի համար։ Ըստ փաստաբանական թիմի՝ նրա ձերբակալումը ոչ իրավաչափ է և ապօրինի, քանի որ ապօրինի հավաքի մասին խոսք լինել չի կարող։
Առուշանյանը ձերբակալվել էր երեկ վաղ առավոտյան այն բանի համար, որ կոչ էր արել գորիսեցիներին առավոտյան ժամը 6.00-ին մեքենաներով արգելափակել Սյունիքի դարպասները և թույլ չտալ, որ վարչապետ Փաշինյանը մտնի Սյունիք։
