Մոտ 15 տարի կպահանջվի ԼՂ տարածքն ականազերծելու համար

Ռազմական գործողություններից հետո Լեռնային Ղարաբաղի տարածքը պայթուցիկներից մաքրելու համար կպահանջվի մոտ 15 տարի:  «ՌԻԱ Նովոստի» գործակալությունն է գրում, հղում անելով ԼՂ մարդասիրական ականազերծման կենտրոնի տնօրեն Սամվել Մեսրոպյանին:

«Արդեն 20 տարի է՝ աշխատում եմ այս մասնագիտությամբ: Ըստ իմ հաշվարկների՝ անհրաժեշտ կլինի մոտ 15 տարի Լեռնային Ղարաբաղի տարածքում ամեն ինչ հայտնաբերելու, ականազերծելու և մաքրելու համար»,-ասել է Մեսրոպյանը և հավելել, որ գնալու են նաև գյուղեր: 
ԼՂ մարդասիրական ականազերծման կենտրոնի տնօրենը նաև հայտնել է, որ հայտնաբերված վտանգավոր առարկաների թվում կան տանկային ու հրետանային արկեր, ձեռքի նռնակներ և կասետային զինամթերք: